v a n g a v e l t u r & v i t l e y s a

Konur & líkaminn...

Hérna má sjá að átta af hverjum tíu konum þola ekki að horfa á líkama sinn í spegli. Hversu sjúkar erum við?

Stúlkur / konur sem lesið síðuna mína - hvað finnst ykkur?

Svefnskuldin að fullu greidd.

Undanfarinn sólarhring hef ég líklega sofið eina sextán tíma, þar af tólf óslitna tíma í nótt. Mér líður eins og ég hafi eignast nýjan líkama. Magnað.

Rannveig Rist

Fór eftir vinnu í dag í heimsókn kvennadeildar Verkfræðingafélagsins í Álverið (og já - stórt Á - Álverið er draumastaður). Þar tóku á móti okkar kvenkyns verkfræðingar Álversins og fræddu okkur um starfsemina, starfsmannastefnuna og gengi fyrirtækisins undanfarin ár. Það er ekki laust við að mér hafi fundist nett skemmtilegt að taka í höndina á sjálfri Rannveigu Rist - hetju kvenverkfræðinga. Og vá hvað þessi kona er svöl!

Fyrir utan Rannveigu voru þarna Birna Pála, framkvæmdastjóri tæknisviðs og Margrét sem er yfir kersmiðjunni ef ég skildi hana rétt. Hversu svalt er að vera verkfræðingur hjá Álverinu?

Mig hefur alltaf langað til að vinna í Álverinu og eftir þessa heimsókn í dag hefur það ekkert breyst. Stóriðjustelpuna langar að standa undir nafni...

Vikan framundan

er nokkuð þétt skipulögð.

Góð helgi að baki - afslöppun og rólegheit, enda kominn tími til.

Bridget #2 stóð fyrir sínu þrátt fyrir að hafa ekki bætt mikið við fyrri myndina. Það er aldrei leiðinlegt að hafa Colin Firth og Hugh Grant á skjánum. Við stöllurnar vorum sammála um að Hugh hefði nú eiginlega stolið athyglinni frá Colin. Svona er þetta alltaf með slæmu strákana...

Í dag eiga feðgar sem ég þekki afmæli. Til hamingju með það.

Yndislega firrta veröld

Stundum er lífið svo súrrealískt. Til dæmis fékk Birna vinkona mín Harry Belafonte í heimsókn til sín í vinnuna í dag. Hann var reyndar ekki að heimsækja hana sérstaklega en það skiptir ekki máli.

Í Japan hafa menn búið til gerfisporð á höfrung - sjá hér. Það er gott.

Í dag var sex klukkutíma mjög áhugaverður fundur í vinnunni um málefni sem eru mér mjög hugleikin. Ég vonast til þess að framhaldið verði að mínu skapi.

Áðan ræddi ég við mann um gríska stafrófið, sjávarföll og sínusbylgjur á kaffihúsi. Og mér fannst það gaman :)

Núna velti ég því fyrir mér hvort sé betra heima setið eða af stað farið. Það er fokkings fimbulkuldi. En Bölið er nú bara handan við hornið...

Skömm

Lesum og skömmumst okkar fyrir staðfestuna.

hmmm...

L í N A says:

búnað lofta út

L í N A says:

en giska á að það verði brunalykt hérna ansi lengi

L í N A says:

en massagott kartöflusalat

HoneySugarLemonPie says:

lol

HoneySugarLemonPie says:

hvernig tókst þér að brenna þetta svona svakalega?

L í N A says:

var að blogga um hvað ég væri myndarleg að elda

HoneySugarLemonPie says:

HAHAHHAHA auðvitað!!

Nostalgía

Í gærkvöldi þegar ég var að ryksuga (já- líf mitt er æsispennandi) fann ég tungupinnann minn á gólfinu. Ég var búin að steingleyma því að í þrjú ár gekk ég um með pinna í tungunni og fannst það massakúl! Þegar ég fór í starfsviðtalið hjá Delta fattaði ég ekki fyrr en ég var komin inn og farin að bíða eftir deildarstjóranum sem tók mig í viðtal að ég var enn með pinnann fór inn á bað til að skrúfa hann úr.

Þvílíkur rebel sem ég var einu sinni...

Núna er ég hins vegar búin að klæða mig úr dragtinni og hengja hana upp - skella hollum rétti úr Græns Kosts bókinni í ofninn og er að hlusta á Kastljósið á Rás 2 og blogga á milli þess sem ég svara vinnutölvupósti.

Ég er ekki 37 ára - ég er 26 ára...

Kæruleysi

Svo bregðast krosstré sem önnur tré og í óðagoti undanfarinna daga hef ég gleymt að skipuleggja þriðjudagskvöldið... Hvað á ég að gera í kvöld?

Nú eru góð ráð dýr...

Afmælisbarn dagsins:

Þú ert vel vakandi fyrir umhverfinu og næsta nágrenni. Ein ástæðan er sú að þú vilt bæta það sem er í kringum þig. Þú átt gott með að átta þig á aðstæðum og meta styrkleika og veikleika. Þú nýtur þess að þjóna öðrum, hvort sem er með listsköpun, vísindastörfum eða einhverju hagnýtu.

Hmmm... ég er ekki alveg viss um að ég njóti þess að þjóna öðrum... ekki alveg þessi servile týpa.

Hvað um það - bleika stelpupartýið mitt heppnaðist snilldarvel - og var áhugaverð mannfræðileg stúdía þó það hafi ekki verið ætlunin í upphafi. Það kom skemmtilega á óvart hvernig stemmningin er mun afslappaðri þegar karlmenn eru víðs fjarri. 

Fékk fullt af skemmtilegum pökkum - en verð að segja að systkini mínu stálu senunni með því að gefa mér prímus. Hvílík fyrirhyggja og hagkvæmni. Það er nóvember - en ég þarf sko ekki að verða svefnlaus af áhyggjum yfir hvernig ég á að græja kaffið mitt í næstu útilegu sem farin verður í júní - því ég á sko prímus :)

Fékk m.a. Break up survival kit, litla pönnu sem gerir mér kleift að steikja hjartalaga egg & Sex and the City spilið ásamt fleiri góðum hlutum.

Annars var ég að fatta að þetta er fyrsti afmælisdagurinn minn í sjö ár þar sem ég á ekki kærasta. Hvað ætli ég hafi verið að spá á nítján ára afmælinu mínu?

Í dag er svo meiningin að velta fyrir sér tilgangi lífsins, bera statusinn í dag saman við fimm ára áætlunina og e.t.v. gera ný plön. Eða bara horfa á West Wing ef þetta verður of flókið...