v a n g a v e l t u r & v i t l e y s a

163,7 cm

Undanfarin fjórtán ár hef ég staðið á því fastar en fótunum að ég sé sléttir einn og sextíu. Og hver veit, kannski hefði ég farið í gegnum lífið án þess að efast um smæð mína, ef ekki hefði verið fyrir heilsufarskönnunina sem ég fór í í vinnunni í dag.

Þau undur og stórmerki gerðust nefnilega að ég var mæld - og reyndist vera hundraðsextíuogþrírkommasjö sentimetrar. Ég hef sumsé hækkað um 2,3% frá því í morgun.

Ja hérna hér!

Laugardagsmorgunn

Klukkan er hálfellefu á laugardagsmorgni og ég er sest í sófann með tölvuna í fanginu og á leiðinni að  fara að fara yfir ritgerðir. Búin að borða morgunmat, vaska upp, fara í langa morgunsturtu og lesa blöðin.

Í fréttablaðinu var frétt um að gamall kunningi hefði verið dæmdur í 2.5 ára fangelsi fyrir hrottalega nauðgun. Úff.

Þessi strákur er klár, myndarlegur og ótrúlega sjarmerandi þegar hann vill það við hafa. Núna er hann búinn að limlesta tvö líf. Annars vegar líf  lítillar stúlku sem án  efa á eftir að þurfa mikla aðstoð við að jafna sig á þessari hrottalegu árás og eftirköstum hennar. Hins vegar er hann búinn að eyðileggja, eða í það minnsta stórskaða, bjarta framtíð sjálfs sín.

Hver vill ráða dæmdan nauðgara í vinnu?

Venjulega þegar ég hef býsnast yfir kynferðisafbrotum á þessari síðu hef ég ekki haft samúð aflögu gagnvart þeim sem fremur brotið. Ég get ekki sagt að ég hafi mikla samúð með þessum kunningja mínum, en það er undarlegt að þekkja afbrotamanninn og fjölskyldu hans.

Ég vona innilega að litlu stúlkunni takist að takast á við framtíðina og komast í gegnum þetta.

Hvað varðar kunningja minn - þá veit ég ekki... Vonandi finnur hann einhvern tímann frið.

Frosinn dýragarður

Hvað eiga þessi dýr sameiginlegt:

Hæna, snigill, hvalur, hjörtur, humar og kengúra?

Þau búa öll í frystinum mínum...

Fullkominn afmælisdagur

Kæru lesendur nær & fjær, takk fyrir afmæliskveðjurnar :)

Átti fullkominn afmælisdag sem hófst með morgunmat í faðmi nútímafjölskyldunnar*, borðaði  hádegismat með skjallbandalaginu og fékk svo syndsamlega Jóa Fel köku í vinnunni minni.

Brunaði til stóru systur minnar eftir vinnuna - enda freistaði þar afmælisgjöf. Stóra systir er alveg með á hreinu hvað gleður litlu systur og gaf mér svakaflotta Campers Twins skó. Já - þetta afmælið eignaðist ég þrjú ný skópör. Ekki að ég eigi við einhvers konar fíkn að stríða...

Sökum svefnleysis varð ég að leggja mig fyrir kvöldmatinn og eftir quality knús bauð HMM** mér á Banthai þar sem okkur var sýnt hvernig núðlur og karrí eiga að vera. Mmmmmm...

Gott fólk hitti okkur síðan á Bölinu þar sem við innbyrtum nokkra bjóra og snillingarnir Sóley & Gauti færðu mér Hugleikssafnið innpakkað í bleikt karatebelti.

Hetjan handan við hafið átti víst hugmyndina að þessu belti og fær hún sérstakar þakkir fyrir. Hlakka til að fá þig heim Vaka!

Enduðum svo uppi í sófa með West Wing og Djúpan þar til víraði álfurinn datt út af. Frábær dagur.

*Víraði álfurinn, freki persinn Bismark og Hávaxni myndarlegi maðurinn

**HMM = hávaxni myndarlegi maðurinn. Hann heitir Matti & er sætastur

Fullorðin?

Vaknaði tuttuguogsjö ára í morgun í fyrsta skipti. Frekar ljúft ef ég á að segja eins og er, enda var hellt upp á kaffi fyrir mig*, smurt handa mér brauð og mér gefinn pakki.

Skundaði í skólann eftir indælan morgunmat og hélt rúmlega klukkutíma fyrirlestur um eftirfylgni í verkefnum fyrir syfjaða verkfræðinema. Var stressuð til að byrja með - en svo gekk þetta eins og í sögu. Ekki mjög skemmtilegri sögu kannski, nema þið séuð ubernörd, en sögu engu að síður.

Verandi mesta dekurbarn á Íslandi er ég svo klædd í afmælisdress fyrir tugi þúsunda frá móður minni. Virðist ekki skipta miklu máli hversu gömul ég er, ég er alltaf yngsta barnið og dekurbarnið. Ekki mikið hægt að kvarta yfir því.

Vinnudagur framundan og svo matur á Banthai og afmælisbjór á einhverju öldurhúsi bæjarins með góðu fólki.

Lífið er gott.

*í skjöldóttu cappuchinovélinni sem hávaxni myndarlegi maðurinn gaf mér í gærkvöldi. Hún heitir Mukka og er frá Bialetti og gerir nýjan eiganda sinn svooooooo glaðan.

Setning gærkvöldsins

"Mér fannst ég svo vondur að vekja þig. Mér leið eins og ég væri að kveikja í blómi."

Járnagi

Búin að eiga svo ljúfa kvöldstund með Maríu Norðdahl, miklum snillingi og vinkonu minni úr verkfræðinni. Það var humar og kaka og í miðri máltíð kom amazonútsendarinn með langþráða sendingu. Will Oldham er að syngja fyrir mig og það er kveikt á kertum. Klukkan er snemma kvölds og við hliðina á mér liggja þrjár bækur og eftir einni þeirra hef ég beðið í fjögur ár.

Ég er ekki að fara að lesa hana.

Ég er að fara að lesa fjóra kafla í verkefnastjórnunarbók og svo að skrifa uppkast að fyrirlestri sem haldinn verður á mánudagsmorguninn kemur.

Ég er sko konan með járnagann.

Selfoss sökkar!

Fór með hávaxna myndarlega manninum og málurunum sem vinna með honum á árshátíð á Hótel Selfossi um helgina. Málararnir og undirrituð voru kát og ölvuð eins og vera ber, en starfsmenn Hótel Selfoss voru hvorki kátir né ölvaðir. Þeir voru hins vegar afspyrnu lítið þjónustulundaðir og eiginlega bara ótrúlega dónalegir og veittu lélega þjónustu.

Eftir afskipti lögreglunnar, vondan Subway og leiðindaviðmót hótelstarfsmanna fær Selfoss eins og hann leggur sig núll stjörnur og mun víraði álfurinn leggja sig fram um að beina viðskiptum sínum til annarra smábæja á Suðurlandi næst þegar hann leggur leið sína þangað.

***

Um þessar mundir er það vinna, ritgerðayfirferð fyrir verkefnastjórnun og verkefni í stjórnun og líkönum sem eru á dagskrá, auk karateæfinga og annars sprikls. Eins mikið af þessu og hægt er fer fram á nærfötunum undir teppi uppi í sófa :) Sem er bara gott.

Í gamla djobbinu mínu...

...stýrði ég verkefnum ámóta þessu. Ekki að ég ætli að eigna mér heiðurinn af töflunum, en hylkin voru á minni könnu.

Úr morgunkorni Íslandsbanka:

Actavis hefur nú hrint af stað umfangmestu markaðssetningu sinni á árinu með þunglyndislyfinu Sertaline bæði í töflu- og hylkjaformi og í þremur styrkleikaflokkum. Lyfið hefur verið á markaði í Mið- og Austur-Evrópu frá árunum 2003-2004 en er markaðssett í 14 Evrópulöndum nú þegar einkaleyfi þess rennur út þar. Lyfið er markaðssett bæði undir merkjum Actavis og merkjum viðskiptavina í gegnum Medis, dótturfélag Actavis. Samkvæmt tilkynningu frá félaginu er markaðssetningin á Sertaline sú mikilvægasta og umfangsmesta hjá félaginu á árinu og telur fyrsta afhending 70 milljónir tafla og hylkja. Lyfið er framleitt í verksmiðjum félagsins á Íslandi og Möltu og er nú selt í 19 löndum. Stjórnendur félagsins hafa tekið fram að flestar markaðssetningar nýrra lyfja muni eiga sér stað á fjórða ársfjórðungi og að fjórðungurinn verði sá sterkasti á árinu. Styður markaðssetningin á Sertaline það.

p.s. - bara aðeins til að nördast meira. Lyfið heitir Sertraline en ekki Sertaline. Þið sem kannist við það kallið það Zoloft ;)

V fyrir Valgerður

Lífið er auðveldara ef maður lætur smámuni ekki fara í taugarnar á sér. Það er nokkuð langt síðan ég komst að þessum einfalda sannleik og hef lagt mig fram um að muna eftir honum síðan. Eitt fer alltaf jafnóstjórnlega mikið í taugarnar á mér. Nefnilega að nafnið mitt er of langt (eða eitthvað álíka asnalegt) fyrir þjóðskrána og af þeim sökum heiti ég Sigurlína V Ingvarsdóttir í henni.

Ykkur finnst þetta kannski ekki skipta máli? Mér finnst þetta limlesting á nafninu mínu og ég verð alltaf jafnsjúklega pirruð þegar ég man eftir þessu... Góð saga.

Annars er það helst í fréttum að lífið er ljúft, ég er löt að læra en dugleg að baka og vinir mínir valda mér ómældri kátínu þessa dagana.

Jack Johnsson er að syngja fyrir mig og hann er góður í því.