v a n g a v e l t u r & v i t l e y s a

Crazy

Allt að gerast og enginn tími til að blogga.

Matti sætasti átti afmæli á föstudaginn og af því tilefni var efnt til surprise afmælisveislu fyrir hann á föstudagskvöldið. Álfurinn þurfti af því tilefni að halda pókerfeisi í nokkra daga og sökum upptekni og sveimhugni fórst honum það afspyrnuvel úr hendi.

Fyrst var farið með afmælisbarnið á Vín og Skel þar sem snæddir voru sjávarréttir og drukkið hvítvín. Á sama tíma voru vinir afmælisdrengsins og velunnarar í óðaönn að skreyta stóra kassann og bera inn veigar. Þegar skötuhjúin mættu svo til síns heima höfðu gestirnir falið sig og görguðu síðan Sörprææææs! í kór. Svipurinn á HMM var afar kómískur svo ekki sé meira sagt.

Hófst þar með afmælisdjamm með stæl sem lauk ekki fyrr en seint næsta morgun. Kvöldið eftir var svo djamm endurtekið í afmælisveislu Arend, singaporíska þjóðverjans sem vinnur hjá CCP og er mikill snillingur.

Svo kom kreisí mánudagur í vinnunni og allt að gerast og á morgun er ég að fara til Lyon á Game Connection. Gaman gaman.

Kem aftur á föstudaginn.

Plan kvöldsins

... er sushi, háir hælar, bláberjamojito, þrír snillingar af göfgara kyninu, Dolly Parton, nýi kjóllinn minn, slúður, varalitur og fleira frábært. Fullkomin lækning á stemmningu gærdagsins og uppskrift að óvæntum atburðum.

Plan helgarinnar er svo íbúðafrágangur, lestur í sófa, undirbúningur kennslu og bíltúr í Hveragerði. Þetta verður góð helgi :)

Endalok óskynseminnar

Föstudagur í borg óttans. Sólin skín, himininn er heiður og Esjan hæðist að mér fyrir utan gluggann.

Á mánudaginn klukkan 08:15 hefst vetrardagskrá víraða álfsins. Þangað til eru 71 klukkustundir sem nota má undir hvers kyns óskynsemi og vitleysu. Að þeim loknum eru svo fasistatímar að nýju: vinna, skóli, kennsla og karate.

Tilhlökkun og kvíði slást um pláss í hausnum á mér - hugsanlega hef ég tekið stærri bita en ég get kyngt með því að ætla að gera þetta allt. En þá endurskipulegg ég bara dagskrána og læri af því.

Suss hvað skynsemin kemur með aldrinum.

Einhverjar skemmtilegar hugmyndir að vitleysu fyrir helgina?

Íþróttameiðsl

Á þumalfingurgómi vinstri handar er blaðra sem gerir það að verkum að ég hef ekki lengur stjórn á stýripinna fyrir PS2. Að auki er fremsta kjúka sama fingurs bólgin og aum.

Sökudólgurinn er m.a. stafræna stúlkan Nina Williams sem hér má sjá. Við höfum eytt meiri tíma saman en góðu hófi gegnir undanfarnar vikur en neyðumst nú til að taka okkur örlítið hlé á meðan bólgan hjaðnar.

Helgin:

1.5 klst karateæfing

2 klst. skemmtistaðadvöl

10 klst. Tekkenspilun

Lítill svefn

Örlítið af rauðvíni og bjór

Góður matur

Skemmtilegt fólk

Nett dramatík

Gaman :)

Bjórdagurinn!

Í dag fagna allir góðir menn og konur - það eru sextán ár frá því bjórinn var leyfður á Íslandi.

Hugsanlegt er að Bölið verði heimsótt í kvöld...

Sunnudagur...

Ái - mér er illt í augunum. Ástæðan - ég er að fara að skrifa ritgerð um lærdómsfyrirtækið og kennarinn hefur sett strangar reglur um uppsetningu hennar. Hann vill að við notum ljótustu leturgerð í heimi, nefnilega Times New Roman. Ég er ekki glöð!

Annars veit ég afskaplega lítið um lærdómsfyrirtækið - definetely ekki nóg til þess að skrifa 2000 orð +/- 200. Þessum eftirmiðdegi verður sumsé varið í að afla sér þekkingar um þetta merkilega hugtak.

Langar það svo sem ekki neitt - langar miklu meira að liggja uppi í sófa og horfa á West Wing og slaka á - en hey, stundum verður ekki á allt kosið.

Helgin annars prýðileg til þessa, rólegheit á föstudagskvöldið með Súlunni minni og Hjálmatónleikar og Ölstofan eftir þá á laugardagskvöldið. Hitti þar gamlan kunningja og félaga hans, Bernard Zero og ræddi við þá um Biblíuna og fleiri gamlar bækur. Kannski maður ætti einhvern tíma að lesa hana?

Ekki núna samt, núna lærdómsfyrirtækið...

Svoooooo gaman

Þessi helgi skorar hátt á skemmtilega skalanum. Fyrst frábært stelpupartý á föstudagskvöldið hjá Fönnsunni, en hún býr einmitt til bestu Mojitobollu sem sögur fara af. Bærinn var reyndar anticlimax eftir þetta frábæra partý en gærkvöldið bætti upp fyrir það.

Haldið var upp á sjö ára afmæli 5kólablaðsins með því að hittast hjá Birnunni í fordrykk og fara svo á Hereford að borða. Maturinn var brjálæðislega góður, félagsskapurinn frábær og nóg af rauðvíni. Mmmm...

Eftir matinn var aftur haldið til Birnu í frekari léttvínsdrykkju og heitar umræður um stjórnmál og virkjanamál. Stóriðjustelpan og framkvæmdastýran eru ekki alveg sammála í þeim efnum en það gerir ekkert til. Eftir að hafa kjaftað frá sér allt vit var svo ákveðið að sjá Hjálma og KK spila á Grandrokk. Þar var fullt af góðu fólk og tónleikarnir algjör snilld.

Gaaaaaaman.

Það er hins vegar ekki alveg jafngaman að sitja þunnur uppi í sófa að skrifa kafla um stjórnskipulag og verkefnastjórnun fyrir skólann. En það er önnur saga...

Frasi dagsins

Stundum tekst mér að lenda í samræðum sem öllum öðrum í heiminum finnast óáhugaverðar. T.d. hefur komið fyrir oftar en einu sinni að bræðslumark málma hefur borið á góma í návist minni, sumum vina minna til ómældrar ánægju...

Sem betur fer er til í heiminum fólk sem hefur áhuga á svipuðum hlutum og ég. Því var ekkert undarlegt við það þegar frasinn "unaðsleg fundargerð" kom upp í samræðum tveggja systra seint á föstudagskvöldi. Hann hefur klárlega vinninginn yfir aðra frasa þessarar viku.

Eftir þessar skemmtilegu samræður fóru systurnar að borða á Hornið og fóru síðan á Vínbarinn. Það verður ekki endurtekið í bráð. Þaðan hrökkluðust þær á Thorvaldsen og það verður heldur ekki endurtekið í bráð. Til að kóróna kvöldið og ljúka vettvangsrannsókninni gengu þær ásamt bróður sínum í gegnum Kaffi Austurstræti og inn á Rex. Hvorugt verður endurtekið í bráð.

Lexía kvöldsins er sú að halda sig á Vegamótastígnum í framtíðinni.

Laugardagur frá helvíti!?

Til að byrja með langar mig að benda á þá staðreynd að ég steig ekki fæti inn á Ölstofuna um helgina. Það telst til tíðinda.

E.t.v. má skýra þessa undarlegu staðreynd með því að ég þurfti að eyða laugardeginum frá klukkan 9 til 17 í kennslustofu í Endurmenntunarstofnun ásamt hópnum mínum í verkefnastjórnun við að gera drög að verkefnisáætlun og hlusta á fyrirlestra. Af þeim sökum var áætlunin að vera róleg á föstudagskvöldið. Planið var matarboð með svampastelpunum, sem voru í jafnrólegum gír og ég.

Mér tókst þó að detta rækilega ofan í rauðvínsflöskuna mína og var orðin væmin klukkan ellefu. Meðal frasa sem ég notaði (og oftar en einu sinni) var: "við höfum svo mörg tækifæri..." og "þér ber skylda til að nota þennan haus fyrst þú hefur hann...". Kæru svampastúlkur, þær ykkar sem lesa þetta - ég biðst forláts.

Ekki leist mér svo nógu vel á að halda mig við rólegheitaplanið þegar hér var komið sögu svo ég ákvað að blása til vídjókvölds heima hjá mér. Traustur vinur var til í það og við horfðum í sameiningu á West Wing og Buffy the Vampire Slayer til að ganga fjögur. Þá áttaði ég mig á hvaða hrylling ég átti í vændum og skreið í bælið.

Miskunnarlaus vekjaraklukkan vakti mig svo kortér yfir átta og ég drattaðist af stað í þennan dag dauðans. Eftir að hafa staðið mig eins og hetja (að eigin mati) þráði ég ekkert heitar en að komast upp í sófa og eyða fyrrihluta kvöldsins í móki yfir West Wing. Það átti ekki að verða. Fyrst hringdi systir mín og bauð mér í fjölskyldumat klukkan sex og svo hringdi bróðir minn til að biðja mig að keyra sig að sækja bílinn sinn. Yours truly er svo skyldurækin að hún játaði hvoru tveggja.

Klukkan tíu kom ég heim eftir frábæran mat og erfiðar samræður og gat lagst upp í sófa - gjörsamlega búin á því.

Hence - engin Ölstofa og mikið West Wing.