v a n g a v e l t u r & v i t l e y s a

Furðuverk

Brá mér í Breiðholtið í gær að heimsækja nýjasta fjölskyldumeðlim risafjölskyldunnar sem HMM tilheyrir. Ónefnd Harðardóttir er pínulítil og sæt, ókrumpuð með fullkomið lítið kringlótt höfuð, tíu fingur og tíu tær. Fullkomið barn.

Svo skrýtið að sjá svona alveg nýjan einstakling, stórhissa á heiminum. Og skemmtilegt að sjá HMM með frænku sína í fanginu ;)

Haustnótt í Norðurmýri

Það er hægt að hugsa svo margt.

Hugsanirnar á fleygiferð í hausnum mínum, festa sig varla við hugtök eins og fortíð, framtíð og nútíð.

Átakshelgi í verkefnastjórnun næstu helgi, en þá ætlum við Einar að troða fjögurra vikna fróðleik inn í höfuð nemenda okkar á einni helgi. Svo ég hugsa um það á milljón og þá sérstaklega áhættu í verkefnum. Afspyrnuspennandi pælingar.

Þá hef ég minni tíma til að hugsa um konfektmola komandi helgar, nefnilega tónleika meistara Cave í Laugardalshöll. Maðurinn sem spilar á hjartastrengina mína eins og enginn annar, ekki einu sinni Stuart Staples með Tindersticks, er að koma og spila fyrir mig því það er of langt síðan síðast.

Bismark og Milena Kunderova hvæsa vinalega hvort á annað og HMM sefur svefni hinna réttlátu. Kertin brenna í gluggunum og stúlkan í stóra kassanum hlustar á þögnina rofna af fingraslætti á lyklaborð.

Í höfði stúlkurnnar í stóra kassanum eru líka áhugaverðar leynihugsanir sem keppa við æsispennandi átakshelgina. Það er of snemmt að opinbera þær en þær langar út. Vonandi þurfa þær ekki að dúsa of lengi inni.

Svo mikil snilld

Dilbert er svo mikill snillingur - vissuð þið að það er hægt að fara á www.dilbert.com og fá hann sendan í tölvupósti á hverjum degi? Mæli með því.

Helstu fréttir dagsins eru þær að ég er búin að opna MS Word sjö sinnum í dag í staðinn fyrir Internet Explorer. Já, og kveðja Bjarna sem er að fara að gera góða hluti fyrir Google. Go Bjarni!

Kennarinn talar

Fyrirlestur #2 í morgun og fyrsti alvörufyrirlesturinn minn þar sem sá síðasti var eiginlega bara kynning.

Átti í smá internal umræðum við sjálfa mig fyrir fyrirlesturinn og vissi eiginlega ekki alveg hvaða tökum ég ætlaði að taka hann. Fara eigin leið eða herma eftir fyrirlestri um sama efni frá í fyrra, fylgja bókinni nákvæmlega eða lauslega, vera formleg eða casual eða hvað...

Átti svo frábært spjall við Sóleyju sem benti mér á góða punkta og þá small þetta saman í höfðinu á mér.

Vakti svo allt of lengi til að horfa á óskabarnið og damn hvað þessi Magnavaka var slæm. OMG, getið þið ímyndað ykkur hvað verður gert mikið grín að þessu í áramótaskaupinu?

Fyrirlesturinn í morgun gekk svo bara vel, þrátt fyrir þreytu hjá kennurum og nemendum. Mér fannst gaman að segja frá og held að efnið hafi komist vel til skila. Einar var með í fyrirlestrinum og kom með punkta inn á milli og ég held að það format virki prýðilega.

"Komið þið sæl, ég heiti Sigurlína..."

Og svo kemst ég aldrei lengra í höfðinu á mér þegar ég undirbý fyrsta fyrirlestur vetrarins í Verkefnastjórnun 1 - áætlanagerð, sem hefst stundvíslega klukkan 8:20 í fyrramálið í VR2 (ekki að ég sé að bjóða ykkur að koma að fylgjast með).

Hefst þar með ferill minn sem stundakennari við þá merku stofnun, Háskóla Íslands (í fyrra var ég bara aðstoðarkennari). Glærurnar og námskeiðslýsingin eru komnar á netið, samræmingarfundirnir eru búnir og allt er klappað og klárt. Það er ekki laust við smáskjálfta, en mér til furðu er ég eiginlega bara miklu meira spennt en kvíðin.

Wish me luck.

Gulrætur, google & guð

Internetið er áhugaverður staður svo ekki sé meira sagt og ég geri ráð fyrir að engum finnist það neinar fréttir. Rétt í þessu gúglaði ég "allergy to carrots" vegna þess að ég er nefnilega með ofnæmi fyrir hráum, ekki soðnum, gulrótum.

Og á leit minni að upplýsingum um þennan undarlega kvilla fann ég þetta.

Hmmm... hugsaði ég, enn ein matarræðissíðan...

Nei - ekkert enn ein svoleiðis síðan heldur algjörlega sú súrasta. Nefnilega Hallelujah Acres sem hefur slagorðið: Teaching God's original plan for health and healing.

Þar getur maður fylgt The Hallulujah diet sem er: Biblically Based. Scientifically Validated. Personally Evidenced.

Áður en ég missi mig í cut & paste geðveiki og birti megnið af ruglinu á síðunni (og freistast til að panta mér Survival Bar) hef ég bara eina spurningu:

Af hverju er Gauti ekki á msn þegar ég þarf á honum að halda???

Peace out

Ég gleymdi næstum því...

... að á sunnudaginn komst ég að því að ég á sama afmælisdag og Astrid Lindgren.

Það er svalasta nýja staðreyndin í höfðinu á mér þessa dagana.

Ofdekruð & spillt

Í stóra kassanum er þessa dagana að finna ærið safn ýmissa leikfanga. Þar búa tvær laptoptölvur, ein PS2, ein psp og önnur er í heimsókn og um helgina bættist við nýr fjölskyldumeðlimur.

Nintendo DS Lite heitir tækið sem HMM gaf álfinum í tilefni árs afmælisins. Hún er lítil og sæt og henni fylgir penni sem notast á neðri skjáinn sem er snertiskjár.

Með í pakkanum var leikur um skopparaboltann Kirby. Tóm snilld :)

Menningarnæturhelgin skemmtileg að mestu, álfurinn fór á Chippendales með Skrímslunni og ofbauð hegðun íslenskra kvenna, eyddi yndislegum laugardegi með HMM og góðum vinum, borðaði góðan mat á Vín og Skel og fór hamförum á Barnum síðar um nóttina.

Sunnudeginum var að mestu varið í sófahangs, utan heimsóknar til Birnunnar sem í dag heldur til Washington að nema við Georgetown. Verður hennar sárt saknað.

Svo undarlegt...

... að horfast í augu við þann sem þú þekktir best allra, þann sem átti alltaf að vera við hliðina á þér, þann sem einu sinni var moldin þín.

Undarlegt að átta sig á að nú hefurðu ekki hugmynd um hver hann er.

Leiðir skiljast.

Plan kvöldsins

... er sushi, háir hælar, bláberjamojito, þrír snillingar af göfgara kyninu, Dolly Parton, nýi kjóllinn minn, slúður, varalitur og fleira frábært. Fullkomin lækning á stemmningu gærdagsins og uppskrift að óvæntum atburðum.

Plan helgarinnar er svo íbúðafrágangur, lestur í sófa, undirbúningur kennslu og bíltúr í Hveragerði. Þetta verður góð helgi :)