v a n g a v e l t u r & v i t l e y s a

Lotus Professional

Þegar ég var í jóga hjá Guðjóni Bergmann skemmti ég mér dálítið yfir ítarlegum leiðbeiningum sem finna mátti inni á kvennaklósettinu og tóku strangt fram að EKKI MÆTTI HENDA HANDÞURRKUM Í KLÓSETTIÐ - það myndi stíflast. Síðan eru liðin fimm ár og jógaferli mínum lokið í bili. Hins vegar hef ég á þessum fimm árum þónokkuð oft orðið vör við miða á salernum víðs vegar um bæinn sem vara við því að handþurrkum sé hent í klósettið. Nú síðast hér á súpersvölum skrifstofum CCP. Ég hef tekið eftir mynstri, en allar eru hættulegu handþurrkurnar af gerðinni Lotus Professional. Þá spyr ég: "Hvers vegna halda menn áfram að kaupa þessa bráðstíflandi tegund? Væri ekki einfaldara að kaupa eitthvað sem stíflar ekki?"

Þessi pæling bliknar þó í samanburði við nýjustu fréttir, en Oddur Máni Malmberg, fimmtán ára frændi minn og fótboltasnillingur, hefur verið valinn í unglingalandsliðshópinn. Til hamingju!!!

Crazy

Allt að gerast og enginn tími til að blogga.

Matti sætasti átti afmæli á föstudaginn og af því tilefni var efnt til surprise afmælisveislu fyrir hann á föstudagskvöldið. Álfurinn þurfti af því tilefni að halda pókerfeisi í nokkra daga og sökum upptekni og sveimhugni fórst honum það afspyrnuvel úr hendi.

Fyrst var farið með afmælisbarnið á Vín og Skel þar sem snæddir voru sjávarréttir og drukkið hvítvín. Á sama tíma voru vinir afmælisdrengsins og velunnarar í óðaönn að skreyta stóra kassann og bera inn veigar. Þegar skötuhjúin mættu svo til síns heima höfðu gestirnir falið sig og görguðu síðan Sörprææææs! í kór. Svipurinn á HMM var afar kómískur svo ekki sé meira sagt.

Hófst þar með afmælisdjamm með stæl sem lauk ekki fyrr en seint næsta morgun. Kvöldið eftir var svo djamm endurtekið í afmælisveislu Arend, singaporíska þjóðverjans sem vinnur hjá CCP og er mikill snillingur.

Svo kom kreisí mánudagur í vinnunni og allt að gerast og á morgun er ég að fara til Lyon á Game Connection. Gaman gaman.

Kem aftur á föstudaginn.

28 ára og komin heim...

Úff - undanfarnar vikur eru búnar að vera algjört rugl. Álfurinn hefur:

• Hætt störfum hjá Högum
• Útbúið próf í verkefnastjórnun
• Sinnt veikum afa af bestu getu
• Leiðrétt lyfjaskammt á spítala
• Hafið störf hjá CCP
• Tekið þátt í Fanfest 2006*

Vika liðin af nýju vinnunni og hún er frábær. Fullt af frábæru fólki, fullt af dóti til að læra og fullt af spennandi hlutum. Aldrei datt mér í hug að það að lesa Snowcrash myndi nýtast mér í starfi og hvað þá að ég myndi drekka kampavín klukkan sex um morgun með mönnunum sem bera ábyrgð á World of Darkness.

Álfurinn á svo afmæli í dag og fer til Stokkhólms á morgun á Nordnet 2006.

Íha!

*Roskilde hvað?

Eftirsturtuknús

Nú ætla ég að gefa lesendum mínum uppskrift að góðri byrjun á hverjum degi.

Eftirsturtuknús:

• Ein sturta
• Ein nývöknuð stúlka
• Einn sofandi strákur
• Hlýtt rúm

Stillið sturtuna á þægilegan hita. Farið undir vatnið og þvoið andlit, hár og líkama. Skrúfið fyrir vatnið. Þurrkið líkama og vefjið handklæðinu um hárið. Skríðið upp í hlýja rúmið til sofandi stráksins og vekið hann með knúsi. Knúsið þarf að lágmarki að vera ein mínúta, en hámarksárangur næst með fimm mínútum. Farið svo brosandi inn í daginn.

Besta Birna í heimi...

á afmæli í dag.

Til hamingju með daginn sæta mín. Sakna þín!

Næstmesti töffaraskapur í heimi...

... er að keppa í verkefnastjórnun.

Ekki sammála? Believe you me, það er svalt.

Mesti töffaraskapur í heimi er hins vegar að vinna keppnina og fá ferð til Kína í vinning!

Til hamingju Júlía Rós!

Endalaus hamingja!

Átti ljúfan morgun með kaffibolla og fréttablaðið í stóra kassanum í morgun. Sú byrjun á deginum hefði undir venjulegum kringumstæðum nægt til að koma mér kátri inn í daginn en ég fékk líka bónus. Nick Cave ætlar nefnilega að koma, ásamt Bad Seeds, og spila fyrir mig í september.

Það eru tíu ár síðan ég sá kappann fyrst, reyndar í mýflugumynd, á Roskilde '96 og vissi þá eiginlega ekkert hver hann var. Af þeim sökum sá ég bara örfáar mínútur af tónleikunum hans á appelsínugula sviðinu. Síðar sama sumar sá ég heila snilldartónleika á Bizarre festival í Köln og heillaðist upp úr skónum. Árið eftir, eftir að hafa eytt megninu af vetrinum með Cave í eyrunum, elskandi The Boatman's Call, sá ég hann aftur á Roskilde, þá í græna tjaldinu, á tónleikum sem ég lýsti seinna sem "trúarlegri upplifun".

Fjórum árum síðar, ennþá aðdáandi Cave #1, brunaði ég í leigubíl frá Köben til Hróarskeldu og hljóp inn á svæðið við fyrstu tóna Cave og slæmu fræjanna. Aftur í græna tjaldinu og aftur algjör snilld. 2002 sá ég hann svo síðast, á Broadway af öllum stöðum.

Það er alveg sama hvort um er að ræða próf, sambandsslit, tragedíu í fjölskyldunni, eða eðalhamingjumóment, Boatman's Call á alltaf við. Sömuleiðis Ship Song, Weeping Song eða snilldarverkið No more shall we part eins og hún leggur sig.

Cave er að koma og ég er glöð. Hverjir eru memm á tónleikana?

Stóri kassinn

Fengum stóra kassann afhentan snemma, eða á laugardagsmorguninn. Framkvæmdir um helgina voru þó ekki miklar, naglar og skrúfur rifnar úr veggjum og parketlistar sömuleiðis, gólf klædd með pappír og sparslað upp í naglaför og sprungur. Hins vegar er allt tilbúið fyrir vinnutörn vikunnar.

Skemmtilegasta mómentið var þegar HMM færði risastóru fataskápana í svefnherberginu og fann hurð þar á bak við. Pínulítill innbyggður geymsluskápur hafði þá legið þar í felum og varð skötuhjúunum fagnaðarfundur. Verst að það var engin beinagrind í skápnum...

Í dag er góður dagur þar sem heimshornaflakkarinn, bridgespilarinn og besta mamma í heimi, Herta Kristjánsdóttir á afmæli. Ef hún kemst heim frá Kaupmannahöfn fær hún afmælisknús og skoðunarferð um stóra kassann.

Bingó!

Setti hraðamet í íbúðakaupum í lok vikunnar. Það var þannig gert:

1. 16:10   Eign fundin á interneti
2. 16:30   Söluyfirlit komið á e-maili
3. 16:37   Eigandi sannfærður um að hinkra eftir mér og leyfa mér að skoða
4. 16:50   HMM sóttur á Heimsenda
5. 17:10   Lagt fyrir utan myndarlegt hús í Norðurmýrinni
6. 17:11   Eigandi opnar dyr. Eigandi og víraði álfurinn þekkjast
7. 17:12   Dyrnar að íbúðinni opnaðar
8. 17:12   Víraði álfurinn veit að hér mun hann búa
9. 17:30  Víraði álfurinn og HMM koma æst og óðamála í litla kassann
10. 17:40  Parið brunar á froskinum á fasteignasöluna
11. 18:10   Undirskrifað tilboð liggur fyrir

Að svo búnu verður hlé á atburðarrásinni, þar til klukkan 13:23 daginn eftir þegar seljandi skrifar undir. Vei!!!

Nýja heimilið sem hér eftir mun bera nafnið stóri kassinn hefur allt sem Víraða álfinn hefur dreymt um, s.s. baðkar, svalir, falleg gólf og fallegt eldhús, gamaldags lista í loftum og við dyr. Rúsínan í pylsuendanum er svo útleiguherbergi með eldhús- og baðaðstöðu sem fylgir og sér um að greiða af þriðjungi lánanna.

Saga dagsins

... er í boði Fanneyjar. Greðilegt ál!